(۱)کھانے کے وقت کا تعین گھڑی دیکھ کر نہیں بھوک اور پیاس کی شدت کو مدنظر رکھ کر کریں۔ اس طرح آپ اپنی جسمانی ضرورت کو نظر انداز نہیں کریں گے۔ اور اپنے نظام ہضم کےخلاف فضول اور بلامقصد کوشش نہیں کریں گے۔
(۲)کوشش کرکے سادہ غذائوں کی طرف آئیں۔ سبزیوں اور دالوں کو قدرتی شکل میں استعمال کریں۔ منجمد سبزیوں یا کھانوں کو استعمال کرکے قدرت اور اپنی صحت دونوں کے خلاف ایک ایسی جنگ لڑنا شروع کریں جس میں شکست یقینی ہے اور جس کا خمیازہ آپ کے جسم اور جیب دونوں کو بھگتنا پڑتا ہے۔(۳)متوازن خوراک کا تیسرا اصول یہ ہے کہ آپ جب کھانے اور پینے میں مشغول ہوں تو اِدھر اُدھر دھیان نہ بٹائیں۔ کوئی فکری بحث نہ چھیڑیں اور پلیٹ میں کھانے کی کم مقدار نکالیں۔ خود پر تھوڑا سا جبر کریں کہ لوگ کیا کہیں گے کہ یہ کتنا کھا رہے ہیں؟ دراصل ہم کھانا نکالتے وقت بھی آس پاس موجود لوگوں کی پرواہ نہیں کرتے اور باتیں کرتے کرتے ضرورت سے زیادہ کھا لیتے ہیں یا کھانے کی میز سے بھوکے اٹھ جاتے ہیں دونوں صورتیں تباہی لاتی ہیں اور خوراک بے ترتیب ہو جاتی ہے۔ فکر نہ کریں تھوڑے عرصہ میں آپ کا ذہن توازن کا عادی ہو جائے گا اور پھر آپ کی عادت بن جائے گی۔
کیا موٹاپے سے نجات کا کوئی جادو بھرا نسخہ موجود ہے؟
کائنات چار عناصر سے مل کر بنی ہے ان میں پانی، آگ ،ہوا اور مٹی شامل ہیں۔ ہم بھی انہیں چار عناصر کے ملاپ سے بنے ہیں اگر ہم اور آپ اپنی شکل بگاڑنے پر مصر ہو جائیں تو جسم قدرتی حسن کھودے گا۔ متوازن خوراک اور اچھی غذا کا انتخاب ایسا مسئلہ نہیں جو حل نہ ہوسکے آج سے آپ معدے کو تین حصوں میں تقسیم کریں۔معدے کا ایک حصہ ہوا کے لیے مخصوص کردیناچاہئے تاکہ ہوا جگہ گھیرے تو اسے اپنا کام کرنے کا موقع ملے یہ کام قدرت انجام دیتی ہے۔ بشرطیکہ آپ چار روٹیاں کھا کے معدے کو بوجھل نہ کرلیں۔
معدے کا دوسرا حصہ پانی کے لیے اور تیسرا حصہ خوراک کے لیے مخصوص کرلیں۔ ہم غلطی یہیں کرتے ہیں کہ پانی کے حصے کو نظر انداز کر دیتے ہیں اور پہلے خوراک کو معدے میں پہنچانے کا عمل شروع کردیتے ہیں۔ اسی بنیادی غلطی کی وجہ سے ہمارا جسم بے ہنگم ہو جاتا ہے۔ اگر آپ اور ہم اس ترتیب سے خوراک استعمال کریں تو کبھی بھی موٹاپے کا شکار نہ ہوں گے۔ اس مجرب نسخہ کو آسان الفاظ میں یوںسمجھ لیجئے کہ جب بھی کھانا کھائیں پہلے تین چار گہراسانس لیں پھر ہاتھ دھوئیں کھانے بیٹھیں ایک گلاس پانی پی لیں۔ اب معدے میں پانی نے اپنی جگہ لے لی اب معدہ آپ کی خوراک کا منتظر ہے۔ آپ چاول، سالن روٹی جو کھانا چاہیںروغن ہٹا کے کھائیں سلاد کھانے کے دوران مگر پھل دو کھانوں کے وقفہ کے دوران کھائیں۔ پھل کھانے کا ٹائم ٹیبل الگ ہے۔ ماہرین غذائیت پھلوں کی تاثیر اورہاضمے کے عمل کو کھانے کے دورانئے سے الگ جانچتے ہیں۔ہر کھانے سے پہلے تھوڑی سی چہل قدمی کو عادت بنالیں تاکہ ہوا معدے میں اپنا حصہ حاصل کرلے۔ آپ کو حیرت ہوگی کہ مغرب میں موٹاپے کا شکار خواتین و حضرات ہزاروں ڈالر خرچ کرکے معدوں کا آپریشن کروارہے ہیں تاکہ معدے کا کچھ حصہ بند کردیا جائے اورخوراک کا کم حصہ لیا جاسکے۔یہ انتہائی غیر فطری عمل ہے۔ اس سے جسمانی نشوونما رک جاتی ہے معدے کی افادیت اور عناصر کی متوازن ترتیب موٹاپے سے نجات کا واحد مجرب نسخہ ہے تو کیوں نہ آج ہی سے اس پر عمل کیا جائے!