محترم حضرت حکیم صاحب السلام علیکم!ماہنامہ عبقری میں اور میری بیٹی باقاعدگی سے پڑھتی ہیں ‘ جب سے میں آپ کے بتائے ہوئے نسخہ جات خود استعمال کرتی ہوں اور بچوں کو بھی ان باتوںپر عمل کا کہتی ہوں تو آپ کے لیے بہت سی دعائیں دل سے نکلتی ہیں۔ آپ کی کتاب ‘‘میرے طبی زندگی کے ثمرات‘‘ پڑھ کر بے اختیار سبحان اللہ کہنے کو دل چاہتا ہے۔
شوگر کا نسخہ:میں نے ایک دوائی جو کہ شوگر کے لیے نہایت مفید ہے دل چاہتا ہے کہ لکھوں تاکہ اور بہن بھائی بھی اس سے مستفید ہوں۔سبز الائچی ایک چھٹانک اور میتھرے دو چھٹانک لیکر ان دونوں کو گرائنڈ کرلیں اور کھانے سے پہلے شوگر کے مریض شوگر چیک کریں اور دو گھنٹے بعد میں چیک کریں اور موزانہ کریں کہ دوا میں اللہ تعالیٰ نے کتنی زیادہ شفاء رکھی ہے۔ یہ میرا آزمودہ نسخہ ہے ایک چمچ چائے والا بھر کر گرم دودھ کے ساتھ تین مرتبہ کھائیں۔ پھر دیکھیں کہ قدرت نے اس دوا میں کتنی شفاء رکھی ہے۔
کان میں درد کیلئے :اگر کسی کے کان میں درد ہوتو رتن جوت تھوڑی سی لیکر ایک چھٹانک سرسوں کے تیل میں پکا کر ٹھنڈا کرلیں اور پھر کسی شیشی میں ڈال کر رکھیں اور خدانخواستہ کسی کے کان میں اچانک درد محسوس ہوتو نیم گرم کرکے کان میں دو قطرے ٹپکا دیں ان شاء اللہ درد سے آرام آجائے گا ‘یہ ٹوٹکہ میری والدہ صاحبہ نے ہمارے بچپن میں ہم پر آزمایا ہوا ہے۔یرقان کیلئے نسخہ:آملہ 25 گرام، بہیڑہ 25 گرام، بڑی ہرڑ 25 گرام ان سب کو اکٹھا کوٹ کر رات دو چھوٹے چمچ بھگو دیں اور صبح نہار منہ چھان کر مریض کو اکیس دن پلائیں بعد میں ٹیسٹ کروا کر دیکھیں میرا پروردگار ضرور صحت عطا کرےگا اور بعد میں بھی جاری رکھیں اس کا کوئی نقصان نہیں‘ اس کو لگاتار چھ ماہ بھی پیا جاسکتا میں نے دو چار لوگوں کو استعمال کرایا ہے اور اس کا بہت اچھا رزلٹ ملا ہے۔
اسہال کیلئے:اگر کسی کو اسہال یعنی دست وغیرہ آرہے ہوںتو سونف دو چمچ، انار دانہ ایک چھٹانک اور سبز الائچی پانچ عدد لیکر اسے کونڈی میں پیس لیں اور چھان کر اس میں چینی حسب ذائقہ مکس کرکے تین دن پلادیں آپ کو پہلی خوراک پی کر فائدہ ہو جائے گا یہ ہماری امی جان کا آزمودہ ٹوٹکہ ہے جو بہت موثر ہے۔
نیند کے لیے روحانی ٹوٹکہ: اگر رات کو نیند نہ آتی ہوتو اعمال فاطمہؓ زھراؓ کرکے اور سورۂ کوثر کی تسبیح کرتے کرتے نیند آجائے گی۔ اعمال درج ذیل ہیں۔ سورۂ اخلاص تین مرتبہ، سورۂ الحمد چار مرتبہ، استغفرللہ دس مرتبہ، پہلا کلمہ تین مرتبہ، تیسرا کلمہ تین مرتبہ اور آیۃ الکرسی پڑھ کر حصار کھینچ کر سو جائیں نہ تو کوئی ڈرائونہ خواب آئیگا اور نہ کسی طرح کے وسوسے دل میں آئیں۔ باوضو سونے کی کوشش کریں۔

(پوشیدہ، ٹوبہ ٹیک سنگھ)