فاقےختم‘ دولت، عزت اور برکت کیسے ملی؟
اس سلسلے میں قارئین کی آزمودہ تحریریں ’’ ان کی مشکلات‘ فاقے‘ بے روزگاری‘ بیماری کیسے ختم ہوئی؟ کیسے ایک فاقوں میںمبتلا‘ دولت مند ہوا‘‘ شائع کی جائیں گی۔ آپ بھی اپنا یا اپنے کسی عزیز کا آنکھوں دیکھا واقعہ یا سنا ہوا ضرور لکھیں۔ لاکھوں کا بھلا اورآپ کا صدقہ جاریہ

محترم حضرت حکیم صاحب السلام علیکم! اللہ تعالیٰ آپ کو خیر و عافیت والی برکات والی عمر دراز عطا فرمائے۔ اللہ آپ کو آپ کے ہر مقصد میں کامیاب فرمائے اور آپ کی نسلوں کو خیر و عافیت سے سدا آباد رکھے۔ اللہ تعالیٰ نے آپ کے وسیلے سے مجھے ایک نئی زندگی عطا کی ہے۔ میں بچپن سے بہت بیمار رہتی تھی دوسروں کی نظر میں نارمل نہیں تھی لوگ طرح طرح کی باتیں بناتے۔ ڈاکٹرز کہتے ماں باپ کو بلاوجہ پریشان کرتی ہے۔ اسے کچھ نہیں ہے پھر میں اور زیادہ پریشان ہو جاتی۔ اکیلی بیٹھ کر اللہ کے سامنے بہت روتی اور یہ کہتی کہ اے اللہ تو تو جانتا ہے کہ میں کس تکلیف میں دن گزارتی ہوں اور کس تکلیف میں رات گزارتی ہوں ہمارے گھر میں بیسمنٹ ہے میں جب زیادہ تکلیف میں ہوتی تو اپنے دن رات اسی تہہ خانے میں گزارتی کہ گھر والے مجھ سے تنگ نہ آجائیں وہ پہلے ہی میری وجہ سے پریشان ہیں۔ 2014ء میں اللہ تعالیٰ نے آپ سے ملاقات کروائی آپ نے سورئہ فاتحہ کا وظیفہ دیا اور آپ کی دعائوں نے آج مجھے اس قابل بنادیا ہے کہ میں دو دو نوکریاںباپردہ پرسکون ماحول میں کررہی ہوں اور الحمد للہ بالکل ٹھیک ہوں صبح آٹھ بجےابو چھوڑ آتےہیں اور شام چھ بجے تک کام کرتی ہوں۔ سلائی سنٹر میں بچیوں کو سلائی و کڑھائی سکھاتی ہوں۔ تقریباً اٹھارہ ہزار تنخواہ ہو جاتی ہے۔ میں دوسروں پر اس طرح بوجھ تھی کہ بعض اوقات اپنے کھانے کے لیے کچھ لینا محال تھا۔ میری زندگی کے 33سال اسی طرح گزر گئے۔ طلاق یافتہ ہوں ایک دس سالہ بیٹے کی ماںہوں پہلے گھر میں کپڑے سلائی کرتی تھی چار پانچ ہزار مہینے کما لیتی تھی‘ زیادہ بیمار ہونے کی وجہ سے اس سے بھی گئی۔ لیکن میرے دل کے کسی کونے میں اللہ کے گھر کی امید ضرور رہتی تھی۔ 2011 میں اللہ تعالیٰ نے عمرے کی سعادت نصیب کی اس جوش و جذبے سے واپس آئی کہ اب میں کبھی بیمار نہیںہوں‘پھر وہی حال 2012ء میں اللہ تعالیٰ نے پھر اپنے گھر بلایا لیکن واپسی سے کچھ دن پہلے وہیں پھر بیمار ہوگئی پھر آہستہ آہستہ اتنی بیمار ہوگئی مجھے ایسے لگا کہ اب میری زندگی ختم ہو جائے گی لیکن 2013ء میں اللہ تعالیٰ نے عبقری میگزین سے متعارف کروا دیا اور 2014 میں آپ سے ملاقات کروا دی الحمد للہ آج میں بہت خوش اور خوشحال ہوں اور آپ کیلئے دعا گو ہوں‘ وظیفہ بھی کرتی ہوں آپ سے بیعت ہونے کے بعد اب تین تسبیحات بھی پڑھتی ہوں۔ (فوزیہ اقبال، ساہیوال)