محترم حضرت حکیم صاحب السلام علیکم!میں عبقری کو اللہ تعالیٰ کی طرف سے تحفہ سمجھتا ہوں ۔ مجھے ایک دوست نے مشورہ دیا عبقری رسالہ پڑھا کرو۔میں بک اسٹال پر گیا معلوم کیا تو مجھے مل گیا خرید لیا پڑھ کر بہت خوشی ہوئی اسی روز منی آرڈر بھیج کر سالانہ ممبر بن گیا ۔عبقری میں عوام کی بھلائی کیلئے نسخے پڑھ کر بہت خوشی ہوئی پھر سوچا کیوں نہ میں بھی انسانیت کی بھلائی کے لیے حصہ ڈالوں اور عبقری رسالہ کے لیے کچھ نہ کچھ لکھوں اسی بنا پر چند نسخے پیش خدمت ہیں۔
پریشان مرد حضرات کیلئے
ان گولیوں کے استعمال سے سرعت انزال کثرت بول سوزش دور ہوکر قدرتی امساک پیدا ہوتا ہے نسخہ اجوائن خراسانی چار ماشہ، تخم دھتورہ سیاہ چھ ماشہ، نمک سانبھڑ ایک رتی، تینوں ادویات کو زور دار ہاتھوں سے کھرل کریں بعدازیں گوند ببول کے ہمراہ موٹھ کے دانے کے برابر گولیاں بنائیں ایک گولی روزانہ رات کو سوتے وقت دود ھ سے لے لیں تین دن کھا کر پھر تین دن کا وقفہ دیں، پھر تین دن استعمال کریں پھر تین روز وقفہ دیں یہاں تک اکیس روز ہو جائیں، اکیس روز تک طبعی امساک پیدا ہو جاتا ہے۔
تریاق جگر
اجوائن خراسانی چار تولہ لے کر لوہے کی کڑاہی میں ڈال کر اس میں خالص انگوری سرکہ ایک پائو لے کر بھگو دیں اور سائے میں رکھ دیں جب اجوائن خراسانی خشک ہو جائے تو اسے کو محفوظ کرلیں، بس اکسیر جگر تیار ہے دودھ اور پانی سے لسی بنائیں صبح ، دوپہر اور شام لسی کے ساتھ یہ نسخہ استعمال کریں۔ ایک ہفتہ میں ہی فرق نظر آئے گا اس کے علاوہ اور بھی بہت فائدے ہیں جس بچے کو مٹی کھانے کی عادت ہو اس کی وجہ سے کمزور ہوگیا ہو، اس دوا سے ان شاء اللہ بہت فائدہ ہوگا دیگر تلی کے مریضوں کیلئے بھی نفع بخش لیکن تلی کے مریضوں کو دوا عرق اجوائن سے صبح ، دوپہر شام دیں۔ ان شاءاللہ فائدہ ہوگا۔
اکسیر ہیضہ کیلئے مفید
بازار سے ایک تولہ اجوائن خراسانی لے کر صاف کریں، پھر توے پر ڈال کر نیچے آگ جلائیں، یہاں تک کہ جل کر راکھ بن جائے، اتار کر باریک سفوف بنائیں ، اس کے برابر چینی ملائیں اور بوتل میں محفوظ کرلیں۔ مریض کی حالت کتنی ہی کیوں نہ خراب ہو ایک چٹکی ہمراہ پانی سے دیں دوا حلق سے نیچے جاتے ہی اپنا اثر شروع کردے گی اور ان شاء اللہ مریض تندرست ہو جائے گا۔ اللہ تعالیٰ سے دعا ہے کہ اللہ تعالیٰ مجھے اور آپ کو ہمیشہ بھلائی اور نیکی کے کام کرنے کی توفیق دے ۔امین (حکیم نور محمدآرائیں، کراچی)