(تنویر اقبال، پنڈی گھیب)

شیخ الوظائف صاحب السلام علیکم! اللہ آپ کو لمبی عمر عنایت فرمائے اور دنیا و آخرت کی ساری عزتیں، عافیتیں، مقام، سکون عنایت فرمائے۔ اللہ رب العزت آپ کی آپ کی نسلوں کی تسبیح خانہ کی،مخلصین کی اور پوری امت کی حفاظت کفایت، کفالت فرمائے۔
(۱)جن نوجوان لڑکوں یا لڑکیوں کی شادی نہیں ہوئی یا جن کی شادی طے ہوچکی ہے حتیٰ کہ وہ لوگ بھی جو شادی شدہ ہیں ان تمام کے لیے ایک روحانی ٹوٹکہ بمطابق حکم شیخ عرض کرنے کی جسارت کررہا ہوں۔ عمل یہ ہے کہ جن کی شادی ابھی طے نہیں ہوئی وہ اور باقی تمام افراد اوّل تین بار درود ’’اَللّٰھُمَّ صَلِّ عَلٰی سَیِّدِنَا مُـحَمَّدٍ کَما تُـحِبُّ وَ تَرْضٰی لَہٗ‘‘ پڑھے پھر بسم اللہ الرحمن الرحیم کی میم کو سورت فاتحہ کی لاؔم کے ساتھ ملا کر ایک دفعہ آمین تک پڑھے پھر تین دفعہ سورئہ اخلاص قل ھواللہ احد مکمل تین دفعہ بسم اللہ الرحمن الرحیم کے ساتھ پڑھ کر آخر میں درود تاج تین مرتبہ پڑھے یہ ایک مرتبہ عمل مکمل ہوا‘ اس طرح اکتالیس دفعہ روزانہ یہ عمل پڑھنا ہے۔ عمل مکمل کرنے کے بعد پہلی کیفیت والے افراد یوں نیت کریں کہ الٰہی تو جانتا ہے میرا جیون ساتھی کون ہوگا؟ الٰہی میں یہ عمل اس شخص کو ہدیہ کرتا ہوں اور جن کا رشتہ طے ہوچکا ہے وہ اس شخص کا نام لے کر یہ عمل اس کے دل کو ہدیہ کریں اور جن کی شادی ہوچکی ہے وہ اپنے میاں یا اپنی بیوی کا نام لے کر اس کے دل کو ہدیہ کریں۔
اب اس کے کمالات پڑھیں کہ تینوں کیفیات والے یعنی غیر شادی شدہ، یا جن کی منگنی ہوگئی ہو اور شادی شدہ تینوں قسم کے لوگ سدا خوش رہیں گے جو شوہر پڑھ کر بیوی کو ہدیہ کرے گا بیوی اس کی دیوانی ہوگی، جو منگیتر کے لیے پڑھے گا منگیتر اس کی عاشق ہوگی۔ اس کے دل میں محبت کا چراغ روشن سے روشن تر ہوتا جائے گا۔ جھگڑا، الجھائو، ذہنی بے سکونی کبھی پاس نہ آئے گی‘ گھر جنت بنانے کا نسخہ آپ کی خدمت میں عرض کیا ہے کرکے دیکھیں اس کے کمالات اس قدر ہیں کہ بیان سے باہر ہیں۔
(۲) جن لوگوں کو غصہ بہت شدید آتا ہو۔ غصے کی حالت میں آپے سے باہر ہو جاتے ہوں جو لوگ شدید غصے کی وجہ سے نقصانات اٹھا چکے ہوں وہ قرآن مجید کی آیت ’’وَ الْكٰظِمِیْنَ الْغَیْظَ وَ الْعَافِیْنَ عَنِ النَّاسِ وَ اللّٰهُ یُـحِبُّ الْمُحْسِنِیْنَ‘‘ ہر نماز کے بعد ایک تسبیح اوّل آخر درود شریف ایک بار پڑھ کر خود پر دم کریں یا گھر کے کسی فرد، دوست، اولاد، والد، رشتے دار کا تصور کرکے اکتالیس دن تک بلاناغہ پڑھ کر دم کریں ۔ بندہ پاس نہ ہوتو چینی یا شکر پر دم کردیں وہ چینی یا شکر چائے وغیرہ میں ساتھ ساتھ استعمال کریں اور جب چینی شکر کم ہو اس میں مزید چینی شکر شامل کریں جس کے استعمال سے بلڈپریشر نارمل رہتاہے۔