مرض کی شدت نے ہڈیوں کا ڈھانچہ بنادیا رنگ جل کر سیاہ ہوگیا۔ انتقال سے دو تین گھنٹے قبل بہنوں سے کہا کہ مجھے غسل کراکر سفید جوڑا پہنا دیں بستر پر دراز ہوکر تسبیح ہاتھ میں لی والدہ اور بہنوں سے کہا کہ میں درود شریف پڑھنے لگی ہوں

محترم حضرت حکیم صاحب السلام علیکم! عبقری کے کسی شمارے میں’’ایڈیٹر کے قلم سے‘‘ میں آپ نےچند مرحومین کے آخری لمحات کی تصویر کشی نے مجھے بھی ماضی میں جھانکنے پر مجبور کیا۔ میری چند عزیز ہستیوں نے داعی اجل کا اس طرح مسکراتے ہوئے استقبال کیا
کینسر کی شکار معلمہ کا باعث رشک خاتمہ
2005ء میں میری ایک ساتھی معلمہ جو کینسر کا شکار تھیں ان کی وفات کا واقعہ ہر صاحب ایمان کے لیے باعث رشک ہوگا۔ تین سال تک وہ موت و حیات کی کشمکش میں گرفتار رہیں۔ اس موذی مرض کی وجہ سے ایک آنکھ کی بینائی جاتی رہی۔ آپریشن اور ایک سال تک کیموتھراپی کی اذیتیں کمال صبر و ضبط سے برداشت کیں پھر ہمیں پتہ چلا کہ عمرہ کے لیے سعودیہ چلی گئی ہیں۔ واپسی پر جب ہم ملاقات کے لیے گئیں تو بولیں اس مرض سے صحت یابی تو ناممکن ہے پھر مہنگے علاج پر رقم خرچ کرنے کی بجائے سوچا کہ مکہ مدینہ جاکر آنکھوں کی تشنگی بجھالوں۔ مرض کی شدت نے ہڈیوں کا ڈھانچہ بنادیا رنگ جل کر سیاہ ہوگیا۔ انتقال سے دو تین گھنٹے قبل بہنوں سے کہا کہ مجھے غسل کراکر سفید جوڑا پہنا دیں بستر پر دراز ہوکر تسبیح ہاتھ میں لی والدہ اور بہنوں سے کہا کہ میں درود شریف
پڑھنے لگی ہوں آپ سب قرآن پاک کی تلاوت کریں سب اشکبار تلاوت کرتے رہے اور وہ درود شریف کا ورد کرتے ہوئے اللہ کو پیاری ہوگئیں غسل میت کے بعد اللہ گواہ ہے اتنا پیلا، پرسکون اور نورانی چہرہ شاید ہی میں نے کسی کا دیکھا ہو۔
دوسرا واقعہ راولپنڈی کے مشہور علمی و تعلیمی شخصیت قاضی صغیر الحق صاحب کا ہے۔ریٹائرمنٹ کے بعد باقی زندگی فیض الاسلام ادارہ کے یتیم بچوں کے لیے وقف کردی اور اللہ تعالیٰ نے اس عالم میں اپنے پاس بلایا کہ مسجد میں فجر کی نماز ادا کی قرآن پاک کھولا اور تلاوت کرتے ہوئے سرجھک گیا قریب بیٹھے ان کے بھانجے (جو داماد بھی ہیں) نے سر سیدھا کیا تو آنکھیں بند اور ہونٹوں پر مسکان۔
سورۂ رحمٰن کی تلاوت اور خاتمہ بالخیر کے آثار
تیسرا واقعہ میری مرحومہ پھوپھی زاد بہن کا ہے جو ریڑھ کی ہڈی کے نقص سے بالکل کبڑی ہوگئی تھیں۔ مرنے کے بعد بالکل چت سیدھی لپٹی ہوئی کہ انہیں دیکھ کر میں نے ان کی بیٹی سے اللہ کا شکر ادا کرتے ہوئے کہا کہ وہ موت کے بعد اس پوزیشن میں آگئیں پتہ چلا کہ ہر وقت سورئہ رحمن کی تلاوت نے انہیں یہ ثمردیا۔