محترم حضرت حکیم صاحب السلام علیکم!  میں ماہنامہ عبقری بہت شوق سے پڑھتا ہوں‘ خاص طور پر آپ کا طبی آرٹیکل جو کے ہر ماہ ماہنامہ عبقری کے صفحہ نمبر 24 پر آتا ہے‘ میرا سب سے زیادہ پسندیدہ ہے۔ آپ نےایک مرتبہ اپنے طبی کالم میں ’’سفیدپاؤڈر‘‘ کا نسخہ بتایا۔ میرے دوست نےایک دن اپنی بیوی کے بارے میں بتایا کہ اسے معدہ کا السر ہے‘ جس کی ادویات خرید خرید کر وہ تنگ آچکا ہے مگر مرض ٹھیک نہیں ہورہا۔ میں نے اسے یہی ’’سفید پاؤڈر‘‘ والا نسخہ بتا دیا‘ اس کی اہلیہ نے چھ ماہ مسلسل یہ نسخہ استعمال کیا بقول میرے دوست کے اہلیہ کا السر 80فیصد تک ٹھیک ہوچکا ہے اور میری مہنگی ادویات سے جان بھی چھوٹ چکی ہے۔ اس کے علاوہ بھی میں لوگوں کو یہی نسخہ بنا کر دیتا ہوں‘ بے شمار افراد معدہ کے امراض سے چھٹکارا پاچکے ہیں۔ نسخہ درج ہے:۔ھوالشافی:چینی باریک ایک پائو پسی ہوئی‘ میٹھا سوڈا ایک چھٹانک اور ست پودینہ ایک تولہ‘ چینی اور میٹھا سوڈا آپس میں ملائیں اور پھر ست پودینہ اس میں ملا کر خوب رگڑیں اتنا کہ چینی میٹھا سوڈا اور ست پودینہ آپس میں یکجان ہوجائیں۔ کسی ہوا بند ڈبے میں یابوتل میں محفوظ رکھیں۔ زیادہ مقدار میں نہ بنائیں‘ نمی کے موسم میں جم جاتا ہے۔ بناتے رہیں‘ استعمال کرتے رہیں‘ آدھا چمچ کھانے کے بعد‘ دن میں تین دفعہ بھی لے سکتے ہیں‘ اگر طبیعت زیادہ خراب ہو تو بار بار بھی لے سکتے ہیں۔(محمد رئیس قادری‘ کراچی)