جس میں صبح کے بہتر آغاز کیلئے اور دن کی ساری کامیابیوں کے لیے جائز اور صحت مند خیال اور عزم ضروری ہے۔ سب سے پہلے نماز ادا کریں۔ خالق کائنات کی حمد و ثناء بیان کریں اور اس کی نعمتوں اور مہربانیوں کو دل ہی دل میں سوچیں۔ اپنے وقت کے مطابق جس قدر ہوسکے‘ تلاوت کلام پاک کریں۔ آپ اپنے اندر ایک ولولہ تازہ بیدار ہوتا محسوس کریں گے‘ آپ کے عزائم تازہ ہوں گے۔ آپ کے جسم کارواں رواں خوشی اور مسرت سے جھوم اٹھے گا۔ ہلکی ورزش یا چہل قدمی کرنے کے لیے کسی قریبی پارک میں چلے جائیں۔ وہاں ہرے بھرے درختوں اور پھولوں کو دیکھیں۔ اس طرح آپ کو اللہ پاک کی صناعی اور لطیف فطرت نظر آئے گی اور آپ کا توکل اللہ پاک پر مزید پختہ ہوگا اور آپ ایک فرحت بخش کیفیت کے ساتھ پورا دن خوشی وانبساط میں گزارنے کے قابل ہو جائیں گے۔ ہلکی پھلکی ورزش اور مناظر فطرت کے نظارہ کے بعد آپ گھر آکر غسل کریں، دانتوں کی صفائی صبح کا پہلا کام ہونا چاہیے۔ اگر غسل نہ کرسکیں یا سستی محسوس کررہے ہوں تو ہلکا سا تیل ہاتھوں پر لگا کر جسم پر آہستہ آہستہ ملیں۔ اگر غسل سے پہلے جسم کی مالش کرلی جائے تو بہت مفید ہےورنہ غسل کے بعد گیلے جسم پر تیل کی ہلکی ہلکی مالش بہت ہی مفید ہے۔ آپ دیکھیں گے کہ اس طرح آپ کے جسم میں دوران خون بہتر ہوگا۔ جسم میں چستی آئے گی اور آپ کی سستی اور تکان ختم ہو جائے گی۔ آپ کا مزاج خوش گوار ہو جائے گا۔ آپ کی دماغی و جسمانی صلاحیتیں زیادہ بہتر طریقے سے کام کریں گی۔
اس کے بعد ناشتے کی باری آتی ہے۔ صبح کا ناشتہ پورے دن کی مصروفیات کے لیے توانائی فراہم کرنے کا بنیادی جزو ہے۔ اس سے غفلت کرنے والے لوگ تغذیہ کی کمی کا شکار ہو جاتے ہیں۔ متوازن غذا پر مشتمل ناشتہ دن بھر جسم کو تازہ دم رکھتا ہے۔ بہترین صحت کے حامل لوگوں کے ایک سروے سے پتہ چلا کہ ان سب میں متوازن ناشتے کی مشترکہ عادت تھی۔
سات بادام اور سات کشمش رات کو بھگو رکھیں۔ صبح نہار منہ دانتوں سے خوب پیس کرچبا کر کھالیں۔ یا موسم کے مطابق جوس کا ایک گلاس پی لیں یا اگر یہ غذائیں مہنگی ہونے کی وجہ سے آپ استعمال نہ کرسکیں تو آٹے کا چھان رات کو پانی میں بھگو رکھیں۔ صبح چھان کر حسب ضرورت شکر ملا کر پی لیں۔ بہترین غذا ہے۔ یاد رکھیئے گندم کی بھوسی میں وہ فائبر اور وٹامنز موجود ہوتے ہیں۔ جن کی جسم کو ضرورت ہوتی ہے۔ ماہرین صحت شروع سے ناشتے کو بڑی اہمیت دیتے آئے ہیں۔ حضور نبی کریم رحمۃ اللعالمینﷺ نے چودہ سو سال پہلے صبح کے ناشتے کی اہمیت پر اس طرح زور دیا ہے کہ کوئی مسلمان اس سے غفلت نہیں برتتا۔ ایک اور مطالعہ سے پتہ چلا ہے کہ کبھی کبھی ناشتہ کرنے والوں یا بالکل نہ کرنے والوں میں موت کی شرح 28%سے 40% زائد پائی گئی۔ صبح کے ناشتہ میں چھان سمیت روٹی ایک انڈہ یا ترکاری سے کریں اور ناشتہ بھرپور کریں۔ ناشتے سے فارغ ہو کر لباس تبدیل کریں۔ کام پر جانے کی تیاری کے دوران کوئی خوشگوار بات ذہن پر لطیف اور خوش گوار نفسیاتی اثرات مرتب کرتی ہے۔ موبائل میں قرآنی آیات بمعہ ترجمہ اپنی پسندیدہ حمد باری تعالیٰ یا نعت رسول مقبولﷺ سنیئے۔ اس طرح آپ کام کی طرف خوشی خوشی روانہ ہوں گے اور آپ اپنے آپ کو صبح سے شام تک خوش اور چست محسوس کریں گے۔