محترم شیخ الوظائف صاحب السلام علیکم ! اللہ سے امید ہے کہ آپ خیریت سے ہوں گے۔ اللہ آپ کا دستِ شفقت ہمارے سروں پر سلامت رکھے‘آمین!
حضرت جی میں نے نومبر 2023 ہجویری محل سوا ارب درود پاک کے چلہ میں شرکت کی ۔وہاں وہ عجب واقعہ اپنی آنکھوں سے دیکھا‘ نمازِ جمعہ کے بعد وضو کرنے کے لیے جاتی ہوں تو کیا دیکھتی ہوں کہ ایک عورت بے ہوش ہوگئی ہے‘میں وہاں جاتی ہوں۔ اس عورت کی ساتھ والی عورتوں سے پوچھتی ہوں کہ انہیں کیا ہوا تو وہ بتاتی ہیں کہ یہ اماں بے ہوش ہوگئی ہیں۔انہیں اب ہسپتال لے کر جانا ہے‘ میں ان سے کہتی ہوں کہ یہاں پربھی عبقری کی طرف سے ڈاکٹروں کی ایک ٹیم موجود ہے۔میں فوراً بھاگ کر ڈاکٹروں کے کیمپ میں جاتی ہوں ۔ میں ڈاکٹر سے کہتی ہوں کہ مہربانی کرکے آپ میرے ساتھ چلیں ۔وہاں موجود خدمت والے بھی تعاون کرتے ہیں ۔میں چند ہی منٹ میں ڈاکٹر کو لے کرپنڈال میں پہنچتی ہوں۔وہ معائنہ کرنے کے بعد بتاتے ہیںاماں جان اللہ کو پیاری ہوچکی ہیں۔ان کے انتقال کا بہت دکھ ہوا مگر ساتھ یہ بھی خیال آیا کہ اللہ تعالیٰ نے انہیں کیسی قابل رشک موت دی ہے کیونکہ درود پاک کے چلہ میں ان کی موت واقع ہو ئی ۔
اس دن جب رات کو سوتی ہوں تو میں خواب میں کیا دیکھتی ہوں کہ ایک بہت ہی خوبصورت مسجدہے مگر اُس کا کوئی دروازہ نہیں ہے۔ اس اماں کی میت وہاں پر ہے۔ میت کے ساتھ میں کچھ خدمت والی خواتین بھی ہوتی ہیں۔ مگر اماں کی میت کو جو خواتین غسل دے رہی ہوتی ہیں انہوںنے سفید رنگ کے نورانی لباس پہنے ہوتے ہیں۔ وہ ہمیں کہتی ہیں کہ اللہ والیوں کھڑی کیوں ہو۔ آئوہمارے ساتھ اس نیک جنتی خاتون کو غسل دو۔ میں اورخدمت والی خواتین ان کے ساتھ مل کر اس جنتی خاتون کو غسل دیتے ہیں۔ مجھے یہ نہیں پتہ کہ وہ کونسی جگہ تھی اور وہ کونسی مخلوق تھی۔ مگر جب میری آنکھ کھلتی ہے تو اس مبارک خواب پر اس اماں کے بارے میں سوچتی ہوں کہ اللہ تعالیٰ نے سوا ارب درود پاک کے چلہ کی برکت سے کیسے ان کا خاتمہ بالخیر فرمایا ہے۔ایک دن ہم سب نے اس دنیا سے جانا ہے‘اللہ رب العزت سے دعا ہے کہ مجھے بھی ایسی ہی موت دےجیسی موت اس اماں کو نصیب ہوئی۔ اللہ ہم سب کو عطا فرمائیں‘ آمین۔